India US Jet Engine Deal : అమెరికాతో మెగా డీల్..ఇక మన దేశంలోనే ఫైటర్ జెట్ ఇంజన్ల తయారీ.

India US Jet Engine Deal : భారత వాయుసేన చరిత్రలో ఒక సువర్ణ అధ్యాయం మొదలుకాబోతోంది. అగ్రరాజ్యం అమెరికాతో కుదిరిన చారిత్రాత్మక రక్షణ ఒప్పందంతో మన గగనతల రక్షణ కవచం మరింత పటిష్టం కానుంది. యుద్ధ విమానాల ఇంజన్ల తయారీలో కీలకమైన టెక్నాలజీని భారత్‌కు బదిలీ చేసేందుకు అమెరికా దిగ్గజ సంస్థ జీఈ ఏరోస్పేస్ గ్రీన్ సిగ్నల్ ఇచ్చింది. హిందుస్థాన్ ఏరోనాటిక్స్ లిమిటెడ్‎తో కలిసి ఈ ఇంజన్లను ఇక మన దేశంలోనే తయారు చేయనున్నారు. ఇది కేవలం ఒక వ్యాపార ఒప్పందం మాత్రమే కాదు, రక్షణ రంగంలో భారత్ సాధించబోతున్న అతిపెద్ద ఆత్మనిర్భర విజయం.

భారత రక్షణ రంగంలో అత్యంత క్లిష్టమైనదిగా భావించే యుద్ధ విమాన ఇంజన్ల తయారీపై కీలక పురోగతి లభించింది. అమెరికాకు చెందిన జీఈ ఏరోస్పేస్, భారత్‌కు చెందిన హెచ్ఏఎల్ మధ్య సాంకేతిక చర్చలు విజయవంతంగా ముగిశాయి. టెక్నాలజీ ట్రాన్స్‌ఫర్ విషయంలో ఉన్న అడ్డంకులన్నీ తొలగిపోయాయని జీఈ ఏరోస్పేస్ వైస్ ప్రెసిడెంట్ రీటా ఫ్లెహెర్టీ ధృవీకరించారు. దీనివల్ల ప్రపంచంలోనే అత్యంత అధునాతనమైన F414 ఇంజన్ల తయారీ రహస్యాలు ఇప్పుడు భారత్‌కు సొంతం కానున్నాయి. ప్రపంచంలో కేవలం నాలుగైదు దేశాల దగ్గర మాత్రమే ఉన్న ఈ టెక్నాలజీ ఇప్పుడు మన దేశానికి రావడం గర్వకారణం.

తేజస్ Mk2కు కొత్త ఊపిరి

భారత వాయుసేన ప్రస్తుతం యుద్ధ విమానాల కొరతను ఎదుర్కొంటోంది. ఈ ఒప్పందం ద్వారా స్వదేశీ యుద్ధ విమానమైన తేజస్ Mk2 ఉత్పత్తి వేగవంతం కానుంది. తొలుత 99 ఇంజన్లను భారత్‌లోనే తయారు చేయాలని లక్ష్యంగా పెట్టుకున్నారు. ఈ ఇంజన్లు తేజస్ Mk2తో పాటు భవిష్యత్తులో మనం తయారు చేయబోయే ఐదో తరం యుద్ధ విమానం ఏఎమ్ సీఏలో కూడా వాడనున్నారు. ఒప్పందం కుదిరిన రెండేళ్లలోనే హెచ్ఏఎల్ ప్లాంట్‌లో ఉత్పత్తి ప్రారంభం కానుంది. దీనివల్ల విదేశీ కంపెనీలపై ఆధారపడే అవసరం ఉండదు.

నిర్వహణలోనూ స్వయం సమృద్ధి

కేవలం కొత్త ఇంజన్ల తయారీ మాత్రమే కాదు, ప్రస్తుతం మన దగ్గర ఉన్న విమానాల నిర్వహణ కోసం కూడా జీఈ ఏరోస్పేస్ సహకరిస్తోంది. పాత F404 ఇంజన్ల సర్వీసింగ్ కోసం ప్రత్యేకంగా ఒక డిపోను ఏర్పాటు చేయనున్నారు. దీని పూర్తి యాజమాన్యం, నిర్వహణ బాధ్యతలు భారత వాయుసేన దగ్గరే ఉంటాయి. దీనివల్ల విమానాలు రిపేర్ కోసం విదేశాలకు వెళ్లాల్సిన అవసరం ఉండదు, ఫలితంగా కోట్లాది రూపాయల విదేశీ మారక ద్రవ్యం ఆదా అవుతుంది.

భవిష్యత్తు ప్రణాళికలు

ఈ ఒప్పందం కేవలం ఒక ఆరంభం మాత్రమే. భారత్, అమెరికా కలిసి భవిష్యత్తులో 120kN క్లాస్ కు చెందిన మరింత శక్తివంతమైన ఇంజన్లను అభివృద్ధి చేసే దిశగా చర్చలు జరుపుతున్నాయి. ఇది నిజమైతే భారత విమానయాన రంగం రూపురేఖలే మారిపోతాయి. యుద్ధ విమానాలే కాకుండా రవాణా విమానాల ఇంజన్ల తయారీలోనూ భారత్ గ్లోబల్ హబ్‌గా మారే అవకాశం ఉంది. ఈ మెగా డీల్ ద్వారా రక్షణ రంగంలో భారత్ ఒక బలమైన సూపర్ పవర్‌గా ఎదుగుతోంది.