Himachal Pradesh : హిమాచల్‌ప్రదేశ్‌లో కుండపోత వర్షాలు..266 రోడ్లు మూసివేత
హిమాచల్‌ప్రదేశ్‌లో ఇటీవల కురుస్తున్న కుండపోత వర్షాలు, కొండచరియలు విరిగిపడటం వల్ల ప్రజలు తీవ్ర ఇబ్బందులు పడుతున్నారు. ఈ విపత్తు కారణంగా రోడ్డు రవాణా వ్యవస్థ పూర్తిగా స్తంభించిపోయింది. రాష్ట్రంలో వరదలు, కొండచరియలు విరిగిపడటంతో సుమారు 300కు పైగా రోడ్లను మూసివేశారు. జాతీయ రహదారులతో పాటు, చాలా గ్రామీణ రహదారులు కూడా మూతపడ్డాయి. ముఖ్యంగా మండి మరియు కుల్లు జిల్లాలు ఎక్కువగా ప్రభావితమయ్యాయి. ఈ రెండు జిల్లాల్లోనే అత్యధిక సంఖ్యలో రోడ్లు మూతపడ్డాయి. మండి జిల్లాలోని సెరాజ్ నియోజకవర్గంలోనే అత్యధికంగా 74 రోడ్లు మూతపడ్డాయి. చండీగఢ్-మనాలి వంటి ప్రధాన రహదారులు కూడా మూతపడటంతో వాహనాల రాకపోకలు పూర్తిగా నిలిచిపోయాయి. ఇది పర్యాటకులతో పాటు స్థానికులను కూడా తీవ్ర ఇబ్బందులకు గురిచేస్తోంది. సీజన్‌లో వర్షాల కారణంగా ఇప్పటివరకు అనేక మంది ప్రాణాలు కోల్పోయారు. సుమారు 173 మంది మరణించినట్లు అధికారిక నివేదికలు చెబుతున్నాయి. కొండచరియలు విరిగిపడి ఇళ్లు కూలిపోవడం, రహదారులు దెబ్బతినడం, వంతెనలు కొట్టుకుపోవడం వంటి ఘటనలు చోటు చేసుకున్నాయి. మలానా గ్రామాన్ని కలుపుతున్న ఒక వంతెన కొట్టుకుపోవడంతో ఆ గ్రామం బయటి ప్రపంచంతో సంబంధాలు కోల్పోయింది.