Forex Reserves : అగ్రరాజ్యాలకే షాక్ ఇచ్చేలా మన ఫారెక్స్ నిల్వలు..ఇక దిగుమతులకి అస్సలు భయం లేదు బాసూ!

Forex Reserves : భారతదేశ ఆర్థిక వ్యవస్థకు మరో శుభవార్త అందింది. దేశ విదేశీ మారక ద్రవ్య నిల్వలు భారీగా పెరిగి మరింత పటిష్టంగా మారాయి. రిజర్వ్ బ్యాంక్ ఆఫ్ ఇండియా విడుదల చేసిన తాజా గణాంకాల ప్రకారం.. డిసెంబర్ మధ్య నాటికి మన దేశ ఫారెక్స్ నిల్వలు గణనీయమైన వృద్ధిని సాధించాయి. ప్రపంచవ్యాప్తంగా ఆర్థిక అనిశ్చితి నెలకొన్నప్పటికీ.. భారత్ మాత్రం తన ఆర్థిక పటిష్టతను చాటుకుంటూ దూసుకుపోతోంది.

భారత విదేశీ మారక ద్రవ్య నిల్వలు ఈ స్థాయిలో పెరగడానికి ప్రధాన కారణం అంతర్జాతీయ మార్కెట్‌లో పెరుగుతున్న బంగారం ధరలు. ప్రపంచవ్యాప్తంగా పెట్టుబడిదారులు బంగారాన్ని సురక్షితమైన పెట్టుబడిగా భావిస్తుండటంతో, మన దగ్గర ఉన్న గోల్డ్ రిజర్వ్స్ విలువ అమాంతం పెరిగింది. దీనికి తోడు అమెరికన్ డాలర్‌తో పోలిస్తే యూరో, పౌండ్, జపనీస్ యెన్ వంటి ఇతర కరెన్సీల విలువలో వచ్చిన మార్పులు కూడా మన ఫారెక్స్ నిల్వలు పెరగడానికి తోడ్పడ్డాయి. ఐఎంఎఫ్ వద్ద మనకుండే హక్కులు కూడా స్వల్పంగా బలపడ్డాయి.

ప్రస్తుతం మన వద్ద ఉన్న విదేశీ కరెన్సీ నిల్వలు ఎంతగా ఉన్నాయంటే.. దాదాపు 11 నెలల పాటు మనం విదేశాల నుంచి దిగుమతి చేసుకునే చమురు, గ్యాస్, ఇతర నిత్యావసర వస్తువుల ఖర్చులను ఇబ్బంది లేకుండా భరించవచ్చు. ఇది దేశ ఆర్థిక స్థిరత్వాన్ని సూచించడమే కాకుండా, అంతర్జాతీయ పెట్టుబడిదారులకు భారత్ పట్ల నమ్మకాన్ని కలిగిస్తుంది. 2022లో ఎదురైన ఒడిదుడుకుల నుంచి తేరుకుని, 2023, 2024లలో క్రమంగా మెరుగుపడుతూ వచ్చి, ఇప్పుడు 2025లో మన నిల్వలు ఆశాజనకమైన స్థితికి చేరుకున్నాయి.

మన దేశ నిల్వలు వేల కోట్ల డాలర్లలో ఉంటే, పొరుగు దేశం పాకిస్థాన్ పరిస్థితి మాత్రం ఇంకా ఆందోళనకరంగానే ఉంది. స్టేట్ బ్యాంక్ ఆఫ్ పాకిస్థాన్ వెల్లడించిన సమాచారం ప్రకారం.. డిసెంబర్ 19 నాటికి ఆ దేశ సెంట్రల్ బ్యాంక్ వద్ద ఉన్న నిల్వలు కేవలం 15.9 బిలియన్ డాలర్లు మాత్రమే. వాణిజ్య బ్యాంకుల వద్ద ఉన్న నిల్వలు కలుపుకుని మొత్తం 21 బిలియన్ డాలర్లుగా ఉంది. భారత్‌తో పోలిస్తే ఇది చాలా స్వల్పం. పాక్ ఆర్థిక వ్యవస్థ ఇంకా గడ్డు పరిస్థితుల్లోనే కొట్టుమిట్టాడుతోందని ఈ గణాంకాలు స్పష్టం చేస్తున్నాయి.