Nokia Phones: 2010లో ఆర్డర్ చేసిన నోకియా ఫోన్లు ఇప్పుడు డెలివరీ..
కొన్ని కిలోమీటర్ల దూరానికే 16 ఏళ్లు పట్టిన వైనం
లిబియా రాజధాని ట్రిపోలీలో ఓ విచిత్రమైన సంఘటన వెలుగులోకి వచ్చింది. ఓ మొబైల్ ఫోన్ డీలర్కు ఏకంగా 16 ఏళ్ల తర్వాత తను ఆర్డర్ చేసిన ఫోన్ల స్టాక్ అందింది. 2010లో ఆర్డర్ చేసిన ఈ ఫోన్లు, 2011లో దేశంలో మొదలైన అంతర్యుద్ధం కారణంగా ఇన్నాళ్లూ గిడ్డంగుల్లోనే ఉండిపోయాయి. రవాణా వ్యవస్థ కుప్పకూలడం, కస్టమ్స్ కార్యాలయాలు పనిచేయకపోవడంతో ఈ షిప్మెంట్ గురించి అందరూ మరిచిపోయారు.
ఇటీవల ఈ లాంగ్ లాస్ట్ షిప్మెంట్ చేతికి అందగానే, ఆ దుకాణదారుడు నవ్వు ఆపుకోలేకపోయారు. అప్పట్లో మార్కెట్ను ఏలిన బటన్ ఫోన్ల బాక్సులను తెరుస్తూ, "ఇవి ఫోన్లా? లేక చారిత్రక కళాఖండాలా?" అని చమత్కరించారు. ఈ షిప్మెంట్లో అప్పట్లో ఉన్నత వర్గాలకు చిహ్నంగా భావించిన 'మ్యూజిక్ ఎడిషన్', 'నోకియా కమ్యూనికేటర్' వంటి మోడళ్లు కూడా ఉన్నాయి. ఈ అన్బాక్సింగ్ వీడియో సోషల్ మీడియాలో వైరల్ అయింది.
ఈ ఘటనలో మరో ఆశ్చర్యకరమైన విషయం ఏమిటంటే.. ఫోన్లను పంపినవారు, అందుకున్నవారు ఇద్దరూ ట్రిపోలీలోనే, కొన్ని కిలోమీటర్ల దూరంలోనే ఉన్నారు. అయినా డెలివరీకి 16 ఏళ్లు పట్టింది. ఈ వీడియో చూసిన నెటిజన్లు ఫన్నీగా కామెంట్లు పెడుతున్నారు. అంతర్యుద్ధం సామాన్య జీవితాన్ని ఎలా చిన్నాభిన్నం చేస్తుందో ఈ ఘటన తెలియజేస్తోందని కొందరు వ్యాఖ్యానించారు.
మరికొందరైతే ఈ పాత ఫోన్లకు ఇప్పుడు మంచి డిమాండ్ ఉందని, వీటిని ఇప్పుడు అమ్మితే రెట్టింపు లాభం వస్తుందని అభిప్రాయపడ్డారు. "ఈ ఫోన్లకు ట్రాకర్లు ఉండవు, కాబట్టి ఇవి చాలా విలువైనవి" అని ఒకరు కామెంట్ చేయగా, "ఇవి ఒక గొప్ప శకానికి చెందిన ట్రోఫీలు" అని మరొకరు పేర్కొన్నారు.