Gold Card : ‘గోల్డ్ కార్డు’ ఫస్ట్ లుక్‌ను విడుదల చేసిన ట్రంప్

డొనాల్డ్ ట్రంప్ అమెరికా అధ్యక్షుడిగా రెండోసారి అధికారంలోకి వచ్చాక అనేక కీలక నిర్ణయాలు తీసుకున్నారు. అక్రమ వలసలకు అడ్డుకట్ట వేశారు. అంతేకాకుండా విదేశీయులకు జన్మతహ పౌరసత్వాన్ని రద్దు చేశారు. వీసాలకు బ్రేక్ వేశారు. కానీ ఆ మధ్య ఒక కీలక నిర్ణయాన్ని ప్రకటించారు. అమెరికాలో పెట్టుబడులు పెట్టేవారికి గోల్డ్ కార్డు ఇస్తామని.. 5 మిలియన్‌ డాలర్లతో వస్తే పౌరసత్వాన్ని పొందుకోవచ్చని వెల్లడించారు. తాజాగా అందుకు సంబంధించిన గోల్డ్ కార్డు యొక్క ఫస్ట్ లుక్‌ను ట్రంప్ విడుదల చేశారు. ఎయిర్ ఫోర్స్ వన్ విమానంలో విలేకరులతో మాట్లాడుతూ 5 మిలియన్ డాలర్ల గోల్డ్ కార్డ్‌ను చూపించారు. కార్డుపై ట్రంప్ ఫొటో ఉంది. రెండు వారాల్లోపు కార్డ్ అందుబాటులోకి వస్తుందని ట్రంప్ పేర్కొన్నారు.

గోల్డ్ కార్డును 5 మిలియన్‌ డాలర్లతో ఎవరైనా సొంతం చేసుకోవచ్చని ట్రంప్ తెలిపారు. ఈ కార్డును మొదట కొనుగోలు చేసినట్లు ప్రకటించారు. రెండోది ఎవరు కొంటారనేది తెలియదని చెప్పారు. ఈ గోల్డ్‌ కార్డు రెండు వారాల్లో అమ్ముడయిపోతుందని ఆశాభావం వ్యక్తంచేశారు. ఈబీ-5 వీసా విధానాన్ని రద్దు చేసి రూ.43.5 కోట్లు (50 లక్షల డాలర్లు) వెచ్చించేవారికి ఈ గోల్డ్‌ కార్డు అందిస్తామని ట్రంప్‌ ప్రకటించారు. కార్డు కలిగి ఉన్నవారు అమెరికా పౌరసత్వాన్ని పొందుకుంటారు.