AP Mega DSC : ఏపీ మెగా డీఎస్సీ మెరిట్ జాబితా విడుదల.. అభ్యర్థులకు ఇవి తప్పనిసరి..
ఏపీ ప్రభుత్వం చేపట్టిన మెగా డీఎస్సీ మెరిట్ జాబితా శుక్రవారం రాత్రి విడుదలైంది. ఈ జాబితాను డీఎస్సీ అధికారిక వెబ్‌సైట్లలో అందుబాటులో ఉంచారు. అభ్యర్థులు కేవలం ఈ వెబ్‌సైట్ల ద్వారానే సమాచారం పొందాలని అధికారులు సూచించారు. వివిధ కేటగిరీల పోస్టుల నియామక ప్రక్రియలో భాగంగా, జోన్ ఆఫ్ కన్సిడరేషన్‌లోకి వచ్చిన అభ్యర్థులకు వారి వ్యక్తిగత లాగిన్ ద్వారా కాల్ లెటర్లు పంపనున్నారు. కాల్ లెటర్ అందిన అభ్యర్థులు ధ్రువపత్రాల పరిశీలనకు వ్యక్తిగతంగా హాజరుకావాల్సి ఉంటుందని డీఎస్సీ కన్వీనర్ ఒక ప్రకటనలో తెలిపారు.
వెరిఫికేషన్‌కు అవసరమైన ధ్రువపత్రాలు
అభ్యర్థులు సర్టిఫికెట్ వెరిఫికేషన్‌కు హాజరయ్యే ముందు తమకు సంబంధించిన సర్టిఫికెట్లను వెబ్‌సైట్‌లో తప్పనిసరిగా అప్‌లోడ్ చేయాలి. వెరిఫికేషన్ సమయంలో సమర్పించాల్సిన పత్రాల జాబితాను కూడా వెబ్‌సైట్‌లో పొందుపరిచారు.
వెరిఫికేషన్‌కు ఈ పత్రాలను తీసుకెళ్లాలి:
ఒరిజినల్ సర్టిఫికెట్లు
ఇటీవల తీసుకున్న కుల ధ్రువీకరణ పత్రం
గెజిటెడ్ అధికారితో ధ్రువీకరించిన మూడు సెట్ల జిరాక్స్ కాపీలు
ఐదు పాస్‌పోర్ట్ సైజు ఫొటోలు
అర్హత లేకపోతే..
ఎవరైనా అభ్యర్థులు సర్టిఫికెట్ వెరిఫికేషన్‌కు హాజరు కాకపోయినా, సరైన ధ్రువపత్రాలు సమర్పించకపోయినా లేదా తగిన విద్యార్హతలు లేనట్లు రుజువైనా వారికి నియామక ప్రక్రియలో అవకాశం ఉండదు. ఈ పరిస్థితుల్లో మెరిట్ జాబితాలో ఆ తరువాత ఉన్న అభ్యర్థులకు ఆ స్థానాన్ని కేటాయించనున్నట్లు అధికారులు స్పష్టం చేశారు.