కూటమి ప్రభుత్వం వచ్చిన తర్వాత సీఎం చంద్రబాబు నాయుడు అమరావతి విషయంలో ఎంత దూకుడుగా ముందుకు వెళ్తున్నారో మనం చూస్తూనే ఉన్నాం. అమరావతి పనుల్లో ఏ మాత్రం ఆలస్యం జరగొద్దని ఎప్పటికప్పుడు ఆయన స్వయంగా సమీక్షలు నిర్వహిస్తూ పనులు చేపడుతున్నారు. ఏ చిన్న సమస్య అయినా సరే సీఎం చంద్రబాబు నాయుడు స్వయంగా రంగంలోకి దిగాల్సి వస్తుంది. ఇదే ఇప్పుడు కూటమి ప్రభుత్వంకు పెద్ద అడ్డంకిగా మారింది. ఎందుకంటే అమరావతి రైతుల సమస్యల విషయంలో కూడా చంద్రబాబు నాయుడు స్వయంగా రంగంలోకి దిగితేనే పనులు జరుగుతున్నాయి. అంటే స్థానికంగా ఉన్న మంత్రులు, ఎమ్మెల్యేలు, అధికారులు మిగతా వ్యవస్థ ఏం చేస్తున్నట్టు. ఆ మాత్రం సమస్యలు కూడా వాళ్ళు పరిష్కరించలేరా. ఇప్పటికే చంద్రబాబు నాయుడు చాలామంది రైతుల సమస్యలను పరిష్కరించారు. ఇంకో 500 మంది రైతుల భూములకు సంబంధించిన సమస్యలు మాత్రమే మిగిలి ఉన్నాయి.
గ్రామకంటాలు, జరీబు భూములు, వీధి పోట్లు లాంటి సమస్యలు ఉన్నాయి. కానీ వీటిని కూడా స్థానిక నేతలు పరిష్కరించలేకపోయారు. చంద్రబాబు నాయుడు స్వయంగా రంగంలోకి దిగి రైతులతో మాట్లాడి రెండో విడత భూసేకరణకు లైన్ క్లియర్ చేశారు. రెండో విడతలో 16 వేల భూముల సేకరణకు రంగం సిద్ధమైంది. చంద్రబాబు నాయుడు రంగంలోకి దిగేదాకా సమస్యలు పరిష్కారం కావట్లేదు అంటే అమరావతి ప్రాంత ఎమ్మెల్యేలు సరిగా పనిచేయట్లేదు అని టిడిపి అధిష్టానం సీరియస్ గా ఉంది. అందుకే చంద్రబాబు నాయుడు ఇద్దరు మంత్రులు, 23 మంది ఎమ్మెల్యేలకు నోటీసులు ఇచ్చారు.
మంత్రులు, ఎమ్మెల్యేలు గ్రీవెన్స్ నిర్వహించట్లేదని, ప్రజల సమస్యలను సరిగ్గా పట్టించుకోవట్లేదని చంద్రబాబు నాయుడుతో పాటు లోకేష్ కూడా సీరియస్ గానే ఉన్నారు. రైతులు తమ సమస్యలు చెప్పుకోవడానికి వెళ్తే లోకల్ గా ఉండే ఎమ్మెల్యేలు సరిగా స్పందించట్లేదని ఫిర్యాదులు వస్తున్నాయి. అధికారులు అయితే ఏకంగా లంచాలు అడుగుతున్నారంట. ఈ విషయాలు చంద్రబాబు నాయుడు దాకా వెళ్లాయి. రైతుల సమస్యలపై ఏమాత్రం నిర్లక్ష్యం చేసినా సరే చర్యలు కఠినంగా ఉంటాయని చంద్రబాబు నాయుడు హెచ్చరిస్తున్నారు. ఎందుకంటే 2028 నాటికి అమరావతి రాజధాని పూర్తి కావాల్సి ఉంది. భూములు ఇచ్చిన రైతులకు అప్పగించాల్సి ఉంది. కూటమి ప్రభుత్వ కాలం అయిపోయే లోపు అమరావతిని పూర్తి చేయాలన్నది చంద్రబాబు నాయుడు కల. అందుకే లక్షల కోట్ల పెట్టుబడులను, అంతర్జాతీయ కంపెనీలను, జాతీయస్థాయి సంస్థలను, జాతీయ బ్యాంకులను అమరావతికి తీసుకొస్తున్నారు. కూటమి ప్రభుత్వం వచ్చాక అమరావతి పనుల్లో వేగం పెరిగింది. దీన్ని ఇలాగే కంటిన్యూ చేయాలంటే కూటమి ఎమ్మెల్యేలు ఆశించిన స్థాయిలో పని చేయాల్సిందే అంటున్నారు చంద్రబాబు నాయుడు.