PAWAN: నేడు మహారాష్ట్రలో పవన్ పర్యటన

ఆంధ్రప్రదేశ్ ఉపముఖ్యమంత్రి పవన్ కళ్యాణ్ నేడు మహారాష్ట్ర రాష్ట్రంలోని నాందేడ్‌లో విస్తృత పర్యటన చేపట్టనున్నారు. ఆధ్యాత్మిక, సాంస్కృతిక ప్రాధాన్యం కలిగిన కార్యక్రమాల్లో పాల్గొనే ఉద్దేశంతో ఈ పర్యటనను ఆయన నిర్వహిస్తున్నారు. ముఖ్యంగా సిక్కు మతానికి అత్యంత పవిత్రమైన స్థలంగా భావించే తఖత్ సచ్‌ఖండ్ శ్రీ హజూర్ సాహిబ్ గురుద్వారాను దర్శించుకోవడంతో పాటు, చారిత్రక షహీదీ సమాగమంలో పాల్గొననున్నారు.పవన్ కళ్యాణ్ తన పర్యటనను ఉదయం హైదరాబాద్ నుంచి ప్రారంభించనున్నారు. ఉదయం 8 గంటల 30 నిమిషాలకు జూబ్లీహిల్స్‌లోని తన నివాసం నుంచి బయలుదేరి బేగంపేట విమానాశ్రయానికి చేరుకోనున్నారు. అక్కడి నుంచి ప్రత్యేక విమానంలో నాందేడ్‌కు ప్రయాణం చేయనున్నారు. ఉదయం 9 గంటల 45 నిమిషాలకు నాందేడ్‌లోని శ్రీ గురు గోబింద్ సింగ్ జీ విమానాశ్రయానికి ఆయన చేరుకుంటారని అధికార వర్గాలు వెల్లడించాయి.

నాందేడ్ చేరుకున్న అనంతరం, మధ్యాహ్నం 1 గంటల 20 నిమిషాలకు తఖత్ సచ్‌ఖండ్ శ్రీ హజూర్ సాహిబ్ జీ గురుద్వారాను పవన్ కళ్యాణ్ దర్శించుకోనున్నారు. ఈ సందర్భంగా సిక్కు సంప్రదాయం ప్రకారం ఆయన సిక్కు దస్తార్‌ను తలపై ధరించనున్నారు. గురుద్వారాలో నిర్వహించే ఆధ్యాత్మిక కార్యక్రమాల్లో భాగంగా దర్బార్ సాహిబ్‌లో ప్రత్యేక ప్రార్థనల్లో పాల్గొననున్నారు.అలాగే చౌర్ సాహిబ్ సేవ, అర్దాస్ వంటి ముఖ్యమైన సిక్కు ఆచార కార్యక్రమాల్లో కూడా పవన్ కళ్యాణ్ పాల్గొననున్నట్లు సమాచారం. ఈ సేవా కార్యక్రమాల ద్వారా సిక్కు మత సంప్రదాయాల పట్ల తన గౌరవాన్ని తెలియజేయనున్నారని ఆయన సన్నిహితులు చెబుతున్నారు. గురుద్వారా కమిటీ ఆధ్వర్యంలో పవన్ కళ్యాణ్‌కు సంప్రదాయబద్ధంగా సత్కారం నిర్వహించనున్నట్లు తెలుస్తోంది.

ఈ పర్యటనలో మరో ముఖ్య ఘట్టంగా, మధ్యాహ్నం 2 గంటల 10 నిమిషాలకు శ్రీ గురు తేగ్ బహదూర్ సాహిబ్ జీ 350వ షహీదీ సమాగమంలో పవన్ కళ్యాణ్ పాల్గొననున్నారు. సిక్కు చరిత్రలో విశేష ప్రాధాన్యం కలిగిన ఈ సమాగమం, ధర్మ రక్షణ కోసం ప్రాణత్యాగం చేసిన గురు తేగ్ బహదూర్ సాహిబ్ స్మరణార్థంగా నిర్వహించబడుతోంది. ఈ షహీదీ సమాగమంలో దేశంలోని వివిధ ప్రాంతాల నుంచి వచ్చిన సిక్కు భక్తులు, మత పెద్దలు పాల్గొననున్నారు. పవన్ కళ్యాణ్ ఈ కార్యక్రమంలో పాల్గొని గురు తేగ్ బహదూర్ సాహిబ్ త్యాగాన్ని స్మరించడంతో పాటు, మత సామరస్యంపై సందేశం ఇవ్వనున్నారని సమాచారం. ఆయన పాల్గొనడం ఈ కార్యక్రమానికి మరింత ప్రాధాన్యం సంతరించనుందీ.