Activa 125 vs Jupiter 125 : యాక్టివా వర్సెస్ జూపిటర్..125cc స్కూటర్లలో గెలుపెవరిది? ధర, మైలేజీలో ఏది కింగ్?
Activa 125 vs Jupiter 125 : భారతదేశంలో 125cc స్కూటర్ల సెగ్మెంట్ అంటే హోండా యాక్టివా, టీవీఎస్ జూపిటర్ మధ్య జరిగే హోరాహోరీ పోరాటమే గుర్తొస్తుంది. ఈ రెండింటిలో ఏది బెస్ట్ అని తేల్చుకోవడం కస్టమర్లకు ఎప్పుడూ ఒక పెద్ద సవాలే. ధర, మైలేజీ, ఫీచర్లు.. ఇలా ప్రతి విషయంలో ఈ రెండు స్కూటర్లు ఒకదానికొకటి గట్టి పోటీని ఇస్తాయి.
ధర విషయంలో హోండా యాక్టివా 125 కొంచెం ఖరీదైనదిగా కనిపిస్తుంది. యాక్టివా 125 ఎక్స్-షోరూమ్ ధర వేరియంట్ను బట్టి రూ.89,000 నుంచి రూ.93,000 మధ్యలో ఉంటుంది. అదే టీవీఎస్ జూపిటర్ 125 విషయానికి వస్తే, దీని ధర రూ.75,000 నుంచి ప్రారంభమై రూ.87,000 వరకు ఉంటుంది. అంటే జూపిటర్ 125 ధర యాక్టివా కంటే తక్కువగా ఉండి, సామాన్యుడికి అందుబాటులో ఉంది.
పెర్ఫార్మెన్స్ విషయంలో ఈ రెండు స్కూటర్లు దాదాపు సమానంగా ఉన్నాయని చెప్పాలి. యాక్టివా 125లో 123.92 సిసి ఇంజిన్ ఉండగా, అది 8.31 హెచ్పి శక్తిని ఇస్తుంది. జూపిటర్ 125 లో 124.8 సిసి ఇంజిన్ ఉంది, ఇది 8.44 హెచ్పి పవర్ ఇస్తుంది. పేపర్ మీద జూపిటర్ కొంచెం పవర్ఫుల్ గా కనిపిస్తుంది. రోజూ ట్రాఫిక్లో నడపడానికి జూపిటర్ ఇంజిన్ స్మూత్గా ఉండటమే కాకుండా మంచి రైడింగ్ అనుభూతిని ఇస్తుంది. రెండింటిలోనూ సీవీటి ట్రాన్స్మిషన్ ఉండటంతో డ్రైవింగ్ చాలా సులభంగా ఉంటుంది.
పెట్రోల్ రేట్లు మండిపోతున్న ఈ కాలంలో అందరూ చూసేది మైలేజీనే. ఇక్కడ హోండా యాక్టివా 125 పైచేయి సాధిస్తుంది. కంపెనీ లెక్కల ప్రకారం యాక్టివా లీటరుకు సుమారు 60 కిలోమీటర్ల మైలేజీని ఇస్తుంది. అదే టీవీఎస్ జూపిటర్ 125 మైలేజీ 57 కిలోమీటర్ల వరకు ఉంటుంది. మీరు ప్రయాణించే పద్ధతిని బట్టి ఈ అంకెల్లో కొంచెం మార్పులు ఉండవచ్చు, కానీ పొదుపు విషయంలో యాక్టివా కొంచెం బెటర్ ఆప్షన్.
ఫీచర్ల విషయానికి వస్తే జూపిటర్ 125 ఒక అడుగు ముందే ఉంది. ఇందులో 33 లీటర్ల అండర్-సీట్ స్టోరేజ్ ఉంది, ఇది ఈ సెగ్మెంట్లో అతిపెద్దది. రెండు హెల్మెట్లు కూడా ఇందులో సులభంగా పెట్టేయొచ్చు. స్మార్ట్ కనెక్ట్, యూఎస్బీ ఛార్జింగ్ వంటి మోడ్రన్ ఫీచర్లు జూపిటర్ లో ఉన్నాయి. యాక్టివా 125 లో కూడా ఎల్ఈడీ లైటింగ్, డిజిటల్ మీటర్, ఫ్యూయల్ సేవింగ్ కోసం ఐడ్లింగ్ స్టాప్ సిస్టమ్ వంటి అడ్వాన్స్డ్ ఫీచర్లు ఉన్నాయి. మీకు ఎక్కువ స్థలం, టెక్నాలజీ కావాలంటే జూపిటర్, నమ్మకమైన బ్రాండ్ వాల్యూ కావాలంటే యాక్టివా సరైన ఎంపిక.