Financial Freedom : ఫైనాన్షియల్ ఫ్రీడమ్‌కు మూడు మార్గాలు.. రిటైర్మెంట్‌కు 10 లక్షలతో ఆగిపోకుండా ఉండాలంటే ఏం చేయాలి?

Financial Freedom : మంచి చదువు, మంచి జీతం ఉన్న ఉద్యోగం సంపాదించుకుంటే జీవితం స్థిరపడినట్లే అని చాలా మంది భావిస్తారు. అయినప్పటికీ, చాలా మంది మధ్యతరగతి ఉద్యోగులు రిటైర్ అయ్యే సమయానికి పీఎఫ్ డబ్బు తప్ప, బ్యాంకులో కేవలం రూ.5-10 లక్షలు మాత్రమే బ్యాలెన్స్ కలిగి ఉంటారు. ఒక ఇల్లు కొనుగోలు చేసినా, దాని ఈఎంఐ రిటైర్మెంట్ అయ్యే వరకు కడుతూనే ఉంటారు. ఈ పరిస్థితి నుంచి బయటపడి ఆర్థిక స్వాతంత్ర్యం పొందాలంటే ఏం చేయాలి? సంపదను సృష్టించడంలో సహాయపడే మూడు ముఖ్యమైన అంశాలను ప్రముఖ చార్టెడ్ అకౌంటెంట్ తన సోషల్ మీడియా పోస్ట్‌లో వివరించారు.

సంపద సృష్టికి మూడు ముఖ్యమైన అంశాలు

ఆయన ప్రకారం కేవలం మంచి జీతం ఉన్న ఉద్యోగం మాత్రమే కాకుండా, ఈ మూడు అంశాలపై దృష్టి పెడితేనే సంపద సృష్టించి ఆర్థిక స్వాతంత్ర్యం సాధించడం సాధ్యమవుతుంది. అవి రియల్ ఎస్టేట్, ఎంటర్ ప్రెన్యూర్ షిప్, క్యాష్‌ఫ్లో

రియల్ ఎస్టేట్

రియల్ ఎస్టేట్ అనేది స్థిరమైన, నిరంతరాయంగా వచ్చే పాసివ్ ఇన్‌కమ్ను సృష్టించగల సామర్థ్యాన్ని కలిగి ఉంటుంది. మీరు ఒక ఇల్లు లేదా దుకాణం కట్టి అద్దెకు ఇచ్చినప్పుడు ఆ అద్దె ఆదాయం దాదాపుగా ఆగదు. మీరు ఉద్యోగం చేస్తున్నా లేదా వ్యాపారం చేస్తున్నా, రియల్ ఎస్టేట్ నుంచి వచ్చే అద్దె ఆదాయం నిరంతరం వస్తూనే ఉంటుంది. ఇది మీ ఆర్థిక స్వేచ్ఛకు బలమైన ఆధారం అవుతుంది.

ఎంటర్ ప్రెన్యూర్ షిప్

ఉద్యోగిగా పరిమిత జీతం పొందడానికి బదులుగా, సొంతంగా వ్యాపారం చేయడం ద్వారా ఆదాయాన్ని ఎంతైనా పెంచుకునే అవకాశం ఉంటుంది. మీరు ఉద్యోగం చేస్తే జీతం ద్వారా పరిమిత ఆదాయం మాత్రమే లభిస్తుంది. కానీ, సొంతంగా వ్యాపారం చేస్తే, మీరు మీ లాభాన్ని అపరిమితంగా పెంచుకోవడానికి అవకాశం ఉంటుంది. పెద్ద సంపదను సృష్టించడానికి, త్వరగా ఆర్థిక స్వాతంత్ర్యం పొందడానికి ఎంటర్ ప్రెన్యూర్ షిప్ ఒక పవర్ఫుల్ సాధనం అని ఆయన అభిప్రాయపడ్డారు.

క్యాష్ ఫ్లో

క్యాష్‌ఫ్లో అంటే మీకు అవసరమైనప్పుడు సులభంగా, త్వరగా ఉపయోగించుకోవడానికి వీలుగా ఉండే లిక్విడ్ మనీ అని అర్థం. మీ దగ్గర ఎప్పుడూ అందుబాటులో ఉండే క్యాష్‌ఫ్లో ఉంటే, మీరు ఊహించని పెట్టుబడి అవకాశాలను వెంటనే ఉపయోగించుకోవచ్చు. అత్యవసర ఖర్చులు వచ్చినప్పుడు ఇది అండగా నిలుస్తుంది. లేదంటే అప్పుల ఊబిలో చిక్కుకోవాల్సిన పరిస్థితి వస్తుంది. మెరుగైన ఆర్థిక నిర్ణయాలు తీసుకోవడానికి నిరంతర క్యాష్‌ఫ్లో చాలా కీలకం.

డిగ్రీలు నిరుపయోగం

సంపద సృష్టికి సంబంధం లేని అంశాలను కూడా కౌశిక్ ప్రస్తావించారు. ఉద్యోగుల విషయానికి వస్తే, ఉన్నత డిగ్రీలు కూడా నిరుపయోగమని ఆయన అన్నారు. మీరు రిటైర్ అయిన తర్వాత మీ డిగ్రీలు మీకు సహాయం చేయవు, మీరు క్రియేట్ చేసిన నిజమైన(రియల్ ఎస్టేట్, వ్యాపార పెట్టుబడులు మొదలైనవి) మాత్రమే మీకు అండగా ఉంటాయని ఆయన స్పష్టం చేశారు.