Gold Price : బంగారం ధర భగ్గుమంటోంది..వచ్చే ఏడాదికి ఎంత అవుతుందో తెలుసా?

Gold Price : బంగారం ధర రోజురోజుకు ఆకాశాన్ని అంటుతోంది. గత కొన్నేళ్లుగా పసిడి రేటులో అసాధారణమైన పెరుగుదల కనిపిస్తోంది. బంగారం మాత్రమే కాదు, వెండి, ప్లాటినం, రాగి వంటి విలువైన లోహాల ధరలు కూడా విపరీతంగా పెరిగాయి. గత ఒక సంవత్సరంలో బంగారం ధర ఏకంగా 65% పెరగడం గమనార్హం. ధర గరిష్ఠ స్థాయికి చేరిందిలే అని అనుకున్నవారి అంచనాలు పూర్తిగా తలకిందులయ్యాయి. ఈ లోహాల ధరల పెరుగుదల ఇప్పట్లో ఆగేలా కనిపించడం లేదు.

బంగారం ధరలో వచ్చిన పెరుగుదలను పరిశీలిస్తే, దాని వేగం ఎంత ఉందో అర్థమవుతుంది. 24 క్యారెట్ల బంగారం రెండు సంవత్సరాల క్రితం, అంటే 2023 అక్టోబర్ 8-9 తేదీల్లో, ఒక గ్రాము 24 క్యారెట్ల బంగారం ధర రూ.5,688 ఉండేది. ఇప్పుడు, 2025 అక్టోబర్ 8 నాటికి అది రూ.12,315కు పెరిగింది. ప్రస్తుతం దీని ధర రూ.12,415గా ఉంది. 22 క్యారెట్ల బంగారం రెండు సంవత్సరాల క్రితం రూ.5,262 ఉన్న 22 క్యారెట్ల బంగారం ధర ఇప్పుడు రూ.11,290కి చేరింది.

వెండి ధర : వెండి ధర కూడా ఊహించని విధంగా పెరిగింది. 2023లో కిలో వెండి ధర రూ.68,800 ఉండగా, 2024లో అది రూ.93,400 అయింది. ఇప్పుడు కిలో వెండి ధర ఏకంగా రూ.1.61 లక్షలుగా ఉంది.

ముందు ముందు బంగారం ధర ఎంత పెరుగుతుంది?

ముందు రోజుల్లో బంగారం ధర తగ్గే అవకాశం లేదని నిపుణులు అంచనా వేస్తున్నారు. అంతేకాదు, ధరల పెరుగుదల వేగం కూడా మందగించే సూచనలు కనిపించడం లేదు. రోజుకు రూ.50 నుంచి రూ.200 వరకు ధర పెరిగే అవకాశం ఉందని నిపుణులు అంచనా వేస్తున్నారు. వారి అంచనా ప్రకారం, 2026 అక్టోబర్ నాటికి బంగారం ధర గ్రాముకు రూ.15,000 మార్కును దాటి కొత్త రికార్డును సృష్టించవచ్చు. అదే విధంగా, వెండి ధర కూడా రూ.2 లక్షల మార్కును దాటే అవకాశం ఉంది. పసిడి ప్రియులు ఈ ఊహించని పెరుగుదలను దృష్టిలో పెట్టుకోవాలి.

ధరలు ఇంతగా పెరగడానికి కారణాలు ఏంటి?

చారిత్రక రికార్డులను పరిశీలిస్తే, సాధారణంగా బంగారం, వెండి ధరలు సంవత్సరానికి 8% నుంచి 15% వరకు పెరుగుతుంటాయి. కానీ, గత ఒక సంవత్సరం నుంచి ఇవి 60% కంటే ఎక్కువగా పెరగడానికి అనేక కారణాలు ఉన్నాయి. బంగారం పరిమితంగా లభించడం ప్రధాన కారణం. అలాగే ప్రపంచవ్యాప్తంగా నెలకొన్న అస్థిర పరిస్థితులు, భౌగోళిక రాజకీయ ఉద్రిక్తతల కారణంగా పెట్టుబడిదారులు సురక్షితమైన పెట్టుబడిగా బంగారాన్ని కొనుగోలు చేస్తున్నారు. ఆర్థిక వృద్ధి మందగించడం కూడా దీనికి ఒక కారణం. వివిధ దేశాల సెంట్రల్ బ్యాంకులు పెద్ద మొత్తంలో బంగారాన్ని కొనుగోలు చేస్తుండటం వల్ల కూడా డిమాండ్ పెరిగింది. వెండి, రాగి వంటి లోహాలు కూడా పారిశ్రామిక అవసరాలకు ఎక్కువగా ఉపయోగపడటం వల్ల వాటికి డిమాండ్ పెరిగి ధరలు పెరుగుతున్నాయి.