Tata Tiago iCNG: రూ.5.50 లక్షలకే టాటా టియాగో సీఎన్‌జీ..లీటరుకు 28 కిలోమీటర్ల మైలేజీతో సంచలనం.

Tata Tiago iCNG: టాటా మోటార్స్ అనగానే అందరికీ ముందుగా గుర్తొచ్చేది ఆ కార్ల బిల్డ్ క్వాలిటీ, భద్రత. ప్రస్తుతం పెరుగుతున్న పెట్రోల్ ధరల నుంచి ఉపశమనం పొందాలనుకునే సామాన్యులకు టాటా కంపెనీ తన పాపులర్ హ్యాచ్‌బ్యాక్ టాటా టియాగో రూపంలో ఒక అద్భుతమైన సీఎన్‌జీ ఆప్షన్‌ను అందిస్తోంది. ఇది కేవలం టాటాలోనే కాదు, భారత మార్కెట్లోనే అత్యంత సురక్షితమైన, చౌకైన సీఎన్‌జీ కార్లలో ఒకటిగా నిలిచింది. టాటా మోటార్స్ నుంచి వస్తున్న అత్యంత చౌకైన సీఎన్‌జీ కారు టాటా టియాగో. ఈ కారు ధర, మైలేజీ విషయానికి వస్తే, దీని బేస్ వేరియంట్ (XE iCNG) ఎక్స్-షోరూమ్ ధర సుమారు రూ.5,48,990 నుంచి ప్రారంభమవుతుంది. మీరు గనుక అన్ని రకాల ఫీచర్లు ఉన్న టాప్ వేరియంట్ (XZA+ iCNG AMT) కావాలనుకుంటే దాని ధర రూ.8,09,690 (ఎక్స్-షోరూమ్) వరకు ఉంటుంది. మార్కెట్లో దీనికి పోటీగా మారుతీ సుజుకీ సెలెరియో సీఎన్‌జీ, హ్యుందాయ్ గ్రాండ్ i10 నియోస్ వంటి కార్లు ఉన్నప్పటికీ సేఫ్టీ విషయంలో టియాగోనే ముందుంటుంది.

మైలేజీ పరంగా టియాగో వినియోగదారులను అస్సలు నిరాశపరచదు. కంపెనీ, వివిధ నివేదికల ప్రకారం.. టియాగో సీఎన్‌జీ మాన్యువల్ వేరియంట్ కేజీకి 26.49 కిలోమీటర్ల మైలేజీని ఇస్తుండగా, ఆటోమేటిక్ వేరియంట్ ఏకంగా 28.06 కిలోమీటర్ల మైలేజీని అందిస్తోంది. ఇంత తక్కువ ధరలో ఆటోమేటిక్ సీఎన్‌జీ ఆప్షన్ ఇస్తున్న ఏకైక కారు ఇదే కావడం విశేషం. దీనివల్ల సిటీ ట్రాఫిక్‌లో ప్రయాణించే వారికి గేర్లు మార్చే ఇబ్బంది లేకుండా క్లచ్ లేని డ్రైవింగ్ అనుభవం లభిస్తుంది.

భద్రత విషయంలో టాటా టియాగో ఒక ఫోర్ట్రెస్(కోట) లాంటిది. గ్లోబల్ ఎన్‌క్యాప్ క్రాష్ టెస్టులో ఈ కారు 4-స్టార్ సేఫ్టీ రేటింగ్ సాధించింది. సీఎన్‌జీ కార్లలో సాధారణంగా ఉండే భయాలను తొలగిస్తూ, ఇందులో ట్విన్ సిలిండర్ టెక్నాలజీని వాడారు. దీనివల్ల డిక్కీలో స్థలం కూడా లభిస్తుంది. అలాగే, సీఎన్‌జీ లీక్ అయితే కారు ఆగిపోయేలా సేఫ్టీ ఫీచర్లు, డైరెక్ట్ సీఎన్‌జీ స్టార్ట్ వంటి ఆధునిక సౌకర్యాలు ఇందులో ఉన్నాయి.

ఫీచర్ల విషయానికి వస్తే.. టియాగోలో 7-అంగుళాల టచ్‌స్క్రీన్ ఇన్ఫోటైన్‌మెంట్ సిస్టమ్, ఆపిల్ కార్‌ప్లే, ఆండ్రాయిడ్ ఆటో, హర్మాన్ మ్యూజిక్ సిస్టమ్, ఆటోమేటిక్ క్లైమేట్ కంట్రోల్, ఎలక్ట్రికల్లీ ఫోల్డబుల్ ORVMs వంటి లగ్జరీ ఫీచర్లు ఉన్నాయి. తక్కువ ధరలో స్ట్రాంగ్ బిల్డ్ క్వాలిటీ, అదిరిపోయే మైలేజీ, ఆధునిక ఫీచర్లు కావాలనుకునే వారికి టాటా టియాగో సీఎన్‌జీ ఒక పర్ఫెక్ట్ ఛాయిస్.