ఆన్‌లైన్ గేమ్‌లో కూతురికి ఎదురైన భయానక దృశ్యాలను బయటపెట్టిన అక్షయ్ కుమార్..

పిల్లల్లో పెరుగుతున్న సైబర్ నేరాల ముప్పును హైలైట్ చేయడానికి తన 13 ఏళ్ల కుమార్తె వీడియో గేమ్ ఆడుతున్న ఒక కలతపెట్టే నిజ జీవిత సంఘటనను బాలీవుడ్ నటుడు అక్షయ్ కుమార్ శుక్రవారం పంచుకున్నారు.

కొన్ని నెలల క్రితం తన కూతురు ఆన్‌లైన్ వీడియో గేమ్ ఆడుతున్నప్పుడు, గుర్తు తెలియని వ్యక్తి  వచ్చి తన ఫోటోలను పంపమని అడిగాడని నటుడు గుర్తుచేసుకున్నాడు.

ఈరోజు ముంబైలోని రాష్ట్ర పోలీసు ప్రధాన కార్యాలయంలో జరిగిన సైబర్ అవేర్‌నెస్ మాసం 2025 ప్రారంభోత్సవంలో ప్రసంగిస్తూ బాలీవుడ్ నటుడు తన అనుభవాన్ని గుర్తు చేసుకున్నారు.

"కొన్ని నెలల క్రితం మా ఇంట్లో జరిగిన ఒక చిన్న సంఘటనను మీ అందరికీ చెప్పాలనుకుంటున్నాను. నా కూతురు వీడియో గేమ్ ఆడుతున్నది, మీరు ఎవరితోనైనా ఆడగల కొన్ని వీడియో గేమ్‌లు ఉన్నాయనే విషయం మీకు తెలిసిందే. మీరు తెలియని అపరిచితుడితో ఆడుతుంటారు". "నువ్వు ఆడుకుంటున్నప్పుడు, కొన్నిసార్లు అక్కడి నుండి మెసేజ్ వస్తుంది...

అలాగే నా కూతురు ఆడుతున్నప్పుడు కూడా ఒక మెసేజ్ వచ్చింది. నువ్వు అమ్మాయివా లేక అబ్బాయివా ?" అని మెసేజ్ వచ్చింది. ఆమె తాను అమ్మాయిని అని రిప్లై ఇచ్చింది. ఆపై అతను మెసేజ్ పంపాడు. నీ నగ్న చిత్రాలను నాకు పంపగలవా? అని. ఆమె వెంటనే స్విచ్ ఆఫ్ చేసి, వెళ్లి నా భార్యతో చెప్పింది. ఇలాగే మొదలవుతుంది. ఇది కూడా సైబర్ నేరంలో ఒక భాగం... మన మహారాష్ట్ర రాష్ట్రంలోని ప్రతి స్కూల్లో ప్రతి వారం ఏడవ, ఎనిమిదవ, తొమ్మిదవ మరియు పదవ తరగతులలో, సైబర్ పీరియడ్ అనే పీరియడ్ ఉండాలని నేను ముఖ్యమంత్రిని అభ్యర్థిస్తున్నాను, అక్కడ పిల్లలకు దాని గురించి వివరించాలి. ఈ నేరం వీధి నేరాల కంటే పెద్దదిగా మారుతోందని మీ అందరికీ తెలుసు. ఈ నేరాన్ని ఆపడం చాలా ముఖ్యం..." అని అక్షయ్ వెల్లడించారు.

వేగంగా మారుతున్న డిజిటల్ ప్రపంచంలో వారు సురక్షితంగా ఉండగలిగేలా సైబర్ విద్యను పాఠశాల విద్యార్థులకు (7వ తరగతి-10వ తరగతి) వారపు సబ్జెక్టుగా చేర్చాలని అక్షయ్ కుమార్ ప్రభుత్వానికి విజ్ఞప్తి చేశారు.

ఈ కార్యక్రమంలో అక్షయ్ మహారాష్ట్ర ముఖ్యమంత్రి దేవేంద్ర ఫడ్నవీస్, డైరెక్టర్ జనరల్ ఆఫ్ పోలీస్ (మహారాష్ట్ర రాష్ట్రం), రష్మి శుక్లా, ఇక్బాల్ సింగ్ చాహల్ (ఐపీఎస్) మరియు రాణి ముఖర్జీలతో పాటు ఇతరులతో కలిసి పాల్గొన్నారు.