Health Risks : ఫ్రిజ్‌లో పెట్టిన పుచ్చకాయ తింటున్నారా? మీకు ఈ సమస్యలు ఖాయం
సమ్మర్ వచ్చిందంటే పుచ్చకాయలకు గిరాకీ విపరీతంగా ఉంటుంది. పుచ్చకాయలో విటమిన్లు ఎ, బి, సి, పొటాషియం, లైకోపీన్, బీటా కెరోటిన్ వంటి అనేక పోషకాలు ఉన్నాయి. ఇవి శరీరానికి చాలా మేలు చేస్తాయి. యాంటీఆక్సిడెంట్ లైకోపీన్ శరీరం యొక్క రోగనిరోధక శక్తిని పెంచడానికి సహాయపడుతుంది. కానీ పుచ్చకాయను కోసిన తర్వాత రిఫ్రిజిరేటర్‌లో ఉంచితే, దానిలోని కీలక పోషకాలైన లైకోపీన్, విటమిన్లు ఎ, సి తగ్గుతాయని నిపుణులు అంటున్నారు. మీరు దానిని ఎక్కువసేపు ఫ్రిజ్‌లో ఉంచితే పండ్లలోని రసం చేదుగా మారుతుంది.
పుచ్చకాయలో 90శాతం కంటే ఎక్కువ నీరు ఉంటుంది. కోసిన వెంటనే తినడం శరీరానికి చాలా మంచిది. అయితే కోసిన తర్వాత ఫ్రిజ్‌లో ఉంచినప్పుడు.. ఈ తేమ బ్యాక్టీరియా పెరగడానికి కారణమవుతుంది. దీనివల్ల ఫుడ్ పాయిజనింగ్ అయ్యే అవకాశం ఉంది. చిన్నపిల్లలు, వృద్ధులు ఇలాంటి రిఫ్రిజిరేటెడ్ పండ్లు తినకుండా ఉండటం మంచిది. రిఫ్రిజిరేటర్‌లో నిల్వ చేసిన పుచ్చకాయ తినడం వల్ల కొన్ని గంటల్లోనే కడుపు నొప్పి, వాంతులు, విరేచనాలు వస్తాయి.
పుచ్చకాయలో సహజ శీతలీకరణ లక్షణాలు ఉన్నాయి. అందుకే వేసవిలో దీనిని తరచుగా తింటారు. కానీ ఫ్రిజ్‌లో ఉంచిన పుచ్చకాయ ఇంకా చల్లగా ఉంటుంది. కొంతమందికి దీన్ని తిన్న వెంటనే దగ్గు, జలుబు, గొంతు సమస్యలు రావచ్చు. ముఖ్యంగా రాత్రిపూట చల్లటి పుచ్చకాయ తినడం వల్ల జీర్ణక్రియ మందగించడమే కాకుండా.. అజీర్ణ సమస్యలు కూడా వస్తాయి. ఇందులో నీటి శాతం ఎక్కువగా ఉండటం వల్ల తరచుగా మూత్ర విసర్జన చేయాల్సి రావచ్చు. ఇది నిద్రకు భంగం కలిగిస్తుంది.
పుచ్చకాయను కోసిన వెంటనే తినడం మంచిది. మీరు దానిని ఫ్రిజ్‌లో ఉంచవలసి వస్తే, రంధ్రాలు ఉన్న మూతతో కప్పండి. ఇది పండ్లలో అదనపు తేమ పేరుకుపోకుండా, బ్యాక్టీరియా పెరగకుండా నిరోధిస్తుంది. పుచ్చకాయను కోసిన 2-3 గంటలలోపు తినడం మంచిది. ఆరోగ్య నిపుణులు రాత్రిపూట పుచ్చకాయ తినమని సిఫార్సు చేయరు. ఎందుకంటే రాత్రిపూట జీర్ణక్రియ మందగిస్తే..అది కడుపు ఉబ్బసానికి కారణమవుతుంది. అందువల్ల ఉదయం లేదా మధ్యాహ్నం పుచ్చకాయ తినడం మంచిది.
మీరు మొత్తం పుచ్చకాయ తినలేకపోతే, దాని రసం తీసి త్రాగడం మంచిది. మీరు పుచ్చకాయ ముక్కలను వడకట్టి నిల్వ చేసుకోవచ్చు. కానీ పుచ్చకాయను ఫ్రిజ్‌లో ఉంచి మరుసటి రోజు తినడం వల్ల దాని పోషకాలు తగ్గుతాయి. అందుకే తాజా పుచ్చకాయ తినడం మంచి ఎంపిక. వేసవికి పుచ్చకాయ మంచి శీతలీకరణ పండు అయినప్పటికీ, సరిగ్గా తినకపోతే ఆరోగ్య సమస్యలు వస్తాయి. శీతలీకరణ తర్వాత తినడం వల్ల పోషకాలు తగ్గిపోయి బ్యాక్టీరియా పెరుగుతుంది. ఫుడ్ పాయిజనింగ్ అయ్యే ప్రమాదం ఉంది. అందుకే పుచ్చకాయ కోసిన వెంటనే తినడం ఆరోగ్యానికి మంచిది.