RED CARD: రెడ్‌ కార్డ్‌కు బలైన తొలి క్రికెటర్‌ ఎవరంటే...

రెడ్‌కార్డ్‌ (Red card)... మాములుగా ఫుట్‌బాల్‌, రగ్భీ, హాకీలాంటి క్రీడల్లో కనిపిస్తుంటుంది. ఆటగాడు నిబంధనలు అతిక్రమించినా, దూకుడుగా వ్యవహరించినా.. ప్రత్యర్థి ఆటగాడిని ఉద్దేశపూర్వకంగా గాయపరిచినా ఈ రెడ్‌ కార్డ్‌ చూపిస్తారు. ఇప్పుడు ఈ రెడ్‌ కార్డ్‌ క్రికెట్‌లోకి ప్రవేశించింది. కరీబియన్‌ ప్రీమియర్‌ లీగ్‌(Caribbean Premier League)లో దీన్ని ప్రవేశపెట్టారు. ఈ నిబంధనకు బలైన తొలి క్రికెటర్‌గా సునీల్‌ నరైన్ (Sunil Narine) చెత్త రికార్డును మూటగట్టుకున్నాడు. కరీబియన్‌ ప్రీమియర్‌ లీగ్‌ ప్రస్తుత ఎడిషన్‌లోనే తొలిసారి క్రికెట్‌లో ఈ రెడ్‌ కార్డ్‌ రూల్‌ అమల్లోకి వచ్చింది.

సెయింట్ కిట్స్ అండ్ నెవిస్ పాట్రియాట్స్(St Kitts and Nevis Patriots), ట్రిన్‌బాగో నైట్‌రైడర్స్(Trinbago Knight Riders ) మధ్య జరిగిన మ్యాచ్‌లో సునీల్‌ నరైన్‌కు అంపైర్‌ రెడ్‌ కార్డ్‌ చూపించి, మైదానాన్ని వీడాల్సిందిగా ఆదేశించాడు. దీంతో రెడ్‌ కార్డ్‌ కారణంగా మైదానం వీడిన తొలి క్రికెటర్‌గా సునీల్ నరైన్ చెత్త రికార్డు మూటగట్టుకున్నాడు. ఈ లీగ్‌లో నరైన్‌ ట్రిన్‌బాగో నైట్‌రైడర్స్‌ జట్టు ప్రాతినిధ్యం వహిస్తున్నాడు. ఆ జట్టు నిర్ణీత సమయంలో 20 ఓవర్లు వేయనందుకు నరైన్‌ రెడ్‌కార్డ్ రూల్‌తో మైదానం వీడాడు. CPLలో కొత్త నిబంధనల ప్రకారం.. నిర్ణీత సమయంలోగా 18 ఓవర్‌ను ప్రారంభించకపోతే ఆ ఓవర్‌లో 30-యార్డ్‌ సర్కిల్ వెలుపల నలుగురు ఫీల్డర్లు మాత్రమే ఉండాలి.

మ్యాచ్‌లో ట్రిన్‌బాగో నైట్‌రైడర్స్‌ 17, 18, 19వ ఓవర్లను కోటా సమయంలో పూర్తి చేయకపోవడంతో అంపైర్‌ ఆ జట్టులోని ఓ ఫీల్డర్‌ను మైదానం వీడాల్సిందిగా ఆదేశించాడు. ఏ ఆటగాడిని బయటకు పంపించాలనేది కెప్టెన్‌ ఇష్టం. ట్రిన్‌బాగో నైట్‌రైడర్స్‌ కెప్టెన్‌ పొలార్డ్(Kieron Pollard).. నరైన్‌ను మైదానాన్ని వీడాలని కోరడంతో (sends off Sunil Narine) అతడు డగౌట్‌లోకి వెళ్లిపోయాడు. దీంతో నైట్‌రైడర్స్‌ 10 మంది ఆటగాళ్లతోనే చివరి ఓవర్‌ కొనసాగించింది.

ఈ మ్యాచ్‌లో సెయింట్‌ కిట్స్‌ అండ్‌ నెవిస్‌ పేట్రియాట్స్‌పై ట్రిన్‌బాగో నైట్‌రైడర్స్‌ 6 వికెట్ల తేడాతో గెలుపొందింది. తొలుత బ్యాటింగ్‌ చేసిన సెయింట్‌ కిట్స్‌.. షెర్ఫాన్‌ రూథర్‌ఫోర్డ్‌ 62 పరుగులతో రాణించడంతో నిర్ణీత ఓవర్లలో 5 వికెట్ల నష్టానికి 178 పరుగులు చేసింది. నైట్‌రైడర్స్‌ బౌలర్లలో సునీల్‌ నరైన్‌ 3 వికెట్లతో రాణించగా.. బ్రావో 2 వికెట్లు పడగొట్టాడు.

179 పరుగుల లక్ష్యఛేదనలో నికోలస్‌ పూరన్‌, 61 పరుగులు, కీరన్‌ పోలార్డ్‌ 37 పరుగులు, రసెల్‌ 8 బంతుల్లోనే 23 పరుగులతో చెలరేగిపోవడంతో నైట్‌రైడర్స్‌ 17.1 ఓవర్లలో కేవలం 4 వికెట్లు మాత్రమే కోల్పోయి గెలిచింది.