REVANTH: స్పీకర్ నిర్ణయం నచ్చకపోతే..కోర్టుకు వెళ్లండి
ఫిరాయింపులపై స్పందించిన సీఎం రేవంత్... సర్వాధికారులు స్పీకర్కే ఉంటాయన్న సీఎం... ప్రభుత్వం జోక్యం చేసుకోదని స్పష్టీకరణ
తెలంగాణ రాజకీయాల్లో గత కొంతకాలంగా ప్రకంపనలు సృష్టిస్తున్న ఫిరాయింపు ఎమ్మెల్యేల అంశంపై ముఖ్యమంత్రి రేవంత్ రెడ్డి కీలక వ్యాఖ్యలు చేశారు. శాసనసభలో సభ్యుల సంఖ్య, వారి హోదా, పార్టీ మార్పులపై నిర్ణయం తీసుకునే సర్వాధికారాలు కేవలం శాసనసభ స్పీకర్కు మాత్రమే ఉంటాయని.. అందులో ప్రభుత్వం జోక్యం చేసుకోదని ఆయన స్పష్టం చేశారు. స్పీకర్ తీసుకున్న నిర్ణయాలను తప్పుబడుతున్న ప్రతిపక్ష పార్టీలకు ఆయన సూటిగా సవాల్ విసిరారు. ముఖ్యమంత్రి రేవంత్ రెడ్డి గురువారం మీడియాతో మాట్లాడుతూ.. శాసనసభ నిబంధనల ప్రకారమే ప్రతి అంశం జరుగుతుందని వివరించారు.
అసంతృప్తి ఉంటే..
స్పీకర్ నిర్ణయం పట్ల ఎవరికైనా అసంతృప్తి ఉంటే.. ప్రజాస్వామ్యంలో న్యాయస్థానాలు ఉన్నాయని.. అక్కడికి వెళ్లి తమ వాదనలు వినిపించుకోవచ్చని సూచించారు. బీఆర్ఎస్ పార్టీకి 37 మంది ఎమ్మెల్యేలు ఉన్నారని ఆ పార్టీ నాయకుడు హరీష్ రావు స్వయంగా ప్రకటించారని రేవంత్ గుర్తుచేశారు. సభలో సభ్యుల సంఖ్యను బట్టి స్పీకర్ బులిటెన్ విడుదల చేసినప్పుడు మౌనంగా ఉండి.. ఇప్పుడు రాజకీయ లబ్ధి కోసం రచ్చ చేయడం సరికాదని మండిపడ్డారు. బీఆర్ఎస్ అధినేత కేసీఆర్ ప్రస్తుతం క్రియాశీల రాజకీయాలకు దూరంగా ఉండటంతో ఆ పార్టీలో క్రమశిక్షణ కరువైందని ఎద్దేవా చేశారు. గజ్వేల్ ప్రజలు సైతం తమ నాయకుడిపై ఆశలు వదులుకున్నారని విమర్శించారు. తెలంగాణలో ఇటీవల జరిగిన గ్రామ పంచాయతీ ఎన్నికల ఫలితాలు కాంగ్రెస్ ప్రభుత్వం చేపట్టిన ప్రజాపాలనకు నిదర్శనమని సీఎం ధీమా వ్యక్తం చేశారు.
రాష్ట్రవ్యాప్తంగా జరిగిన ఎన్నికల్లో కాంగ్రెస్ పార్టీ తన రెబల్ అభ్యర్థులతో కలిపి దాదాపు 66 శాతం స్థానాలను కైవసం చేసుకుంది. మొత్తం 12,702 సర్పంచ్ స్థానాల్లో కాంగ్రెస్ తన ఆధిపత్యాన్ని చాటుకుంది. ఈ ఎన్నికల్లో బీఆర్ఎస్ , బీజేపీ లోపాయికారీ ఒప్పందంతో కూటమిగా పోటీ చేసినప్పటికీ, ప్రజలు వారిని తిరస్కరించారని రేవంత్ రెడ్డి పేర్కొన్నారు. కేవలం 33 శాతం స్థానాలకే ఆ కూటమి పరిమితమైందని గణాంకాలతో సహా వివరించారు.రాష్ట్రంలోని 94 అసెంబ్లీ నియోజకవర్గాల్లో ఎన్నికలు జరగగా.. అందులో 87 నియోజకవర్గాల్లో కాంగ్రెస్ స్పష్టమైన ఆధిక్యం సాధించిందని.. ఇది ప్రభుత్వ పనితీరుకు ప్రజలు ఇచ్చిన సర్టిఫికేట్ అని ఆయన కొనియాడారు.
అధికారం కోల్పోయినా....
ప్రతిపక్ష నేతలు అధికారం కోల్పోయినా అహంకారం వీడటం లేదని రేవంత్ రెడ్డి ఆగ్రహం వ్యక్తం చేశారు. మూసీ నది కాలుష్యం కంటే కొందరు ప్రతిపక్ష నేతల మనసుల్లోనే ఎక్కువ విషం పేరుకుపోయిందని ధ్వజమెత్తారు. ఇందిరమ్మ ఇళ్లు, నిరుద్యోగులకు ఉద్యోగాల కల్పన వంటి పథకాల వల్లనే గ్రామీణ తెలంగాణలో కాంగ్రెస్కు భారీ ఆదరణ లభించిందని చెప్పారు. ఉపాధి హామీ పథకాన్ని నిర్వీర్యం చేసేందుకు కేంద్ర ప్రభుత్వం కుట్రలు చేస్తోందని.. సోనియా గాంధీ, రాహుల్ గాంధీలపై అక్రమ కేసులు పెట్టి వేధిస్తోందని ఆరోపించారు. రాబోయే 2029 ఎన్నికల్లోనూ తెలంగాణలో కాంగ్రెస్ పార్టీయే జయకేతనం ఎగురవేస్తుందని ముఖ్యమంత్రి ధీమా వ్యక్తం చేశారు.