Pawan Kalyan : పవన్ కళ్యాణ్ పేషీలోకి డైనమిక్ ఆఫీసర్

ఏపీ డిప్యూటీ సీఎం పవన్ కళ్యాణ్ ( Pawan Kalyan ) ఆఫీసర్ ఆన్ స్పెషల్ డ్యూటీగా కేరళలోని త్రిసూర్ కలెక్టర్‌ కృష్ణతేజ ( Krishna Teja ) రానున్నారు. పరిపాలనలో తనదైన మార్క్ చూపించాలనుకుంటున్న పవన్ ఏరికోరి ఆయనను నియమించుకుంటున్నారు. కృష్ణతేజను డిప్యుటేషన్‌పై పంపాలని చంద్రబాబు కేంద్రానికి లేఖ రాశారు. 2015 బ్యాచ్‌కి చెందిన కృష్ణతేజది పల్నాడు(D) చిలకలూరిపేట. కేరళలో పర్యాటకాభివృద్ధి, అలప్పుజ కలెక్టర్‌గా అద్భుత పనితీరుతో కేంద్ర అవార్డులు పొందారు.

కృష్ణతేజ 2015 బ్యాచ్‌ ఐఏఎస్‌ అధికారి.. ఆయన గతంలో కేరళ పర్యాటకాభివృద్ధి సంస్థ ఎండీ, పర్యాటకశాఖ డైరెక్టర్, ఎస్సీ అభివృద్ధిశాఖ డైరెక్టర్, అలప్పుజ జిల్లా కలెక్టర్‌గా కూడా పనిచేశారు. కరోనా సమయంలో, ఆ తర్వాత ఎంతోమందికి చేయూతను అందించారు.

కరోనా కారణంతో తల్లిదండ్రులను కోల్పోయిన 609 మంది విద్యార్థులను గుర్తించి.. వారందరికి దాతల సహకారంతో ఉన్నత చదువుకు సాయం అందించారు. అలాగే కరోనా కారణంగా భర్తలను పోగొట్టుకున్న 35 మంది వితంతువులకు ఇళ్లు నిర్మించడంతో పాటుగా 150మందికి ఉపాధి అవకాశాలు కల్పించారు.