MINI Countryman SE All4 : లగ్జరీ ఈవీ మార్కెట్‌లో కొత్త జోష్.. 440కిమీ రేంజ్, అదిరే ఫీచర్లతో కంట్రీమ్యాన్ వచ్చేశాడు.

MINI Countryman SE All4 : భారతదేశంలో లగ్జరీ ఎలక్ట్రిక్ వాహన మార్కెట్ మరింత వేడెక్కింది. ప్రముఖ కార్ల తయారీ సంస్థ ఎంఐఎన్ఐ (MINI), తమ కొత్త పవర్ఫుల్ ఎలక్ట్రిక్ కారు కంట్రీమ్యాన్ ఎస్‌ఈ ఆల్4ను తాజాగా భారత మార్కెట్లోకి విడుదల చేసింది. ఈ కొత్త ఆల్-వీల్ డ్రైవ్ వేరియంట్ ఎక్స్-షోరూమ్ ధర రూ.66.90 లక్షలు. పూర్తిగా తయారైన యూనిట్‌గా భారత్‌కు చేరుకున్న ఈ కారు, ఒక్కసారి ఛార్జ్ చేస్తే 440 కి.మీ. రేంజ్ ఇవ్వడమే కాకుండా, అద్భుతమైన 4-వీల్ డ్రైవ్ ఫీచర్‌తో లగ్జరీ, పవర్‌ను మిళితం చేసింది.

మినీ కంట్రీమ్యాన్ ఎస్‌ఈ ఆల్4 కారును కంప్లీట్లీ బిల్ట్ యూనిట్ మార్గంలో భారత్‌కు తీసుకొచ్చారు. అన్ని మినీ ఇండియా డీలర్ల వద్ద దీని బుకింగ్‌లు ప్రారంభం కాగా, డెలివరీలు వెంటనే మొదలు కానున్నాయి. ఈ కారు చాలా సింపుల్‌గా, కానీ ప్రీమియంగా కనిపిస్తుంది. ఇది లెజెండ్ గ్రే, మిడ్‌నైట్ బ్లాక్ అనే రెండు కలర్ ఆప్షన్లలో లభిస్తుంది. జాన్ కూపర్ వర్క్స్ (JCW) ట్రిమ్‌లో భాగంగా, ఏరోడైనమిక్ డిజైన్, నలుపు రంగు JCW స్పోర్ట్స్ స్ట్రైప్స్, 19-అంగుళాల JCW అల్లాయ్ వీల్స్‌తో మరింత స్పోర్టీ లుక్‌ను ఇచ్చారు.

కంట్రీమ్యాన్ ఎస్‌ఈ ఆల్4 రెండు శక్తివంతమైన ఎలక్ట్రిక్ మోటార్లను కలిగి ఉంది, ఇది పూర్తి ఆల్-వీల్ డ్రైవ్ అనుభూతిని ఇస్తుంది. ఈ కారు 66.45 kWh సామర్థ్యం గల లిథియం-అయాన్ బ్యాటరీతో పనిచేస్తుంది. రెండు మోటార్లు కలిపి 313 bhp (బ్రేక్ హార్స్‌పవర్) శక్తిని, 494 Nm (న్యూటన్ మీటర్లు) టార్క్‌ను ఉత్పత్తి చేస్తాయి. ఈ పవర్ కారణంగా కారు కేవలం 5.6 సెకన్లలో 0 నుండి 100 km/h వేగాన్ని అందుకుంటుంది.

ఒక్కసారి పూర్తిగా ఛార్జ్ చేస్తే, WLTP (ప్రపంచవ్యాప్త తేలికపాటి వాహనాల పరీక్షా విధానం) ప్రకారం ఇది 440 కిలోమీటర్ల వరకు ప్రయాణించగలదు. ఈ కారులో స్పీడ్ ఛార్జింగ్ ఫీచర్లు, అడ్వాన్సుడ్ సేఫ్టీ ఫీచర్లు ఉన్నాయి. 130 kW DC ఫాస్ట్ ఛార్జర్‌ను ఉపయోగించి, కేవలం 8 నిమిషాల్లో 100 కి.మీ.ల రేంజ్‌ను ఛార్జ్ చేయవచ్చు. అలాగే, 10% నుంచి 80% వరకు ఛార్జ్ కావడానికి కేవలం 29 నిమిషాలు మాత్రమే పడుతుంది.

కారు లోపల లెదర్ లేని స్పోర్ట్స్ సీట్లు, ఎలక్ట్రానిక్‌గా సర్దుబాటు చేయగల డ్రైవర్ సీటు ఉన్నాయి. సేఫ్టీ కోసం ఫ్రంట్ ప్యాసింజర్, సైడ్ కర్టెన్ ఎయిర్‌బ్యాగ్‌లు, ABS, డైనమిక్ స్టెబిలిటీ కంట్రోల్, కార్నరింగ్ బ్రేక్ కంట్రోల్, 360-డిగ్రీ కెమెరా వంటి ఫీచర్లు ఉన్నాయి. మినీ ఇండియా ఈ లగ్జరీ ఈవీ కోసం దీర్ఘకాలిక వారంటీ, సర్వీస్ ప్రణాళికలను ప్రకటించింది. కారు కొనుగోలుపై 5 సంవత్సరాల పాటు 24x7 రోడ్‌సైడ్ అసిస్టెన్స్ తో పాటు, బ్యాటరీకి 8 సంవత్సరాలు లేదా 1,60,000 కి.మీ. వరకు వారంటీని అందిస్తోంది. సర్వీస్ ప్లాన్‌లు 4 సంవత్సరాలు/ 2,00,000 కి.మీ. నుంచి ప్రారంభమై, కస్టమర్ల అవసరాలకు అనుగుణంగా 10 సంవత్సరాలు/ 2,00,000 కి.మీ. వరకు పొడిగించుకునే అవకాశం ఉంది.