Ratan Tata : రతన్ టాటా పెంపుడు కుక్క టీటో రాజభోగం.. దానికి నెలకు రూ.30000 పెన్షన్ వస్తుందట.

Ratan Tata : రతన్ టాటా జీవితం కేవలం వ్యాపారానికే పరిమితం కాలేదు. ఆయన ఒక గొప్ప పారిశ్రామికవేత్తగా, సామాజిక సేవకుడిగా ప్రపంచానికి తెలుసు. అయితే, ఆయనకు తన పెంపుడు కుక్కలపై ఉన్న అపారమైన ప్రేమ కూడా తరచుగా వార్తల్లో ఉండేది. ముఖ్యంగా ఆయన జర్మన్ షెపర్డ్ కుక్క టీటో కథ చాలా ఆసక్తికరమైనది. గతేడాది అక్టోబర్ 9న రతన్ టాటా మరణించినప్పటికీ, ఆయన జ్ఞాపకాలు, కుక్కలపై ఆయనకున్న ప్రేమ ఇప్పటికీ సజీవంగా ఉన్నాయి. టాటా తన ప్రియమైన శునకం టీటో కోసం తన వీలునామాలో రూ. 12 లక్షల మొత్తాన్ని కేటాయించారు. అంతేకాక, ప్రతి మూడు నెలలకు రూ. 30,000 పెన్షన్ ఇవ్వాలని కూడా ఏర్పాటు చేశారు. టీటో సంరక్షణ బాధ్యతను తన చిరకాల వంట మనిషి రాజన్ షాకు అప్పగించారు. ఈ విషయం రతన్ టాటాకు టీటో కేవలం పెంపుడు జంతువు కాదని, కుటుంబంలో ఒక ముఖ్య సభ్యుడని నిరూపిస్తుంది.

ఆరు సంవత్సరాల క్రితం టీటోను రతన్ టాటా దత్తత తీసుకున్నారు. 2018లో ఆయన లండన్‌లో ప్రిన్స్ చార్లెస్ నుండి లైఫ్‌టైమ్ అచీవ్‌మెంట్ అవార్డు అందుకోవలసి ఉన్నా, టీటో అప్పుడు అనారోగ్యంతో ఉండటం వల్ల ఆయన ఆ గౌరవాన్ని స్వీకరించడానికి వెళ్లలేదు. ఆ సమయంలో ఆయన "నా కుక్క జబ్బుగా ఉంది, నేను దానిని వదిలి వెళ్లలేను" అని చెప్పడం ద్వారా టీటోపై తనకున్న గాఢమైన ప్రేమను చాటుకున్నారు.

రతన్ టాటా బాంబే హౌస్‌ను వీధి కుక్కలకు సురక్షిత ఆశ్రయంగా మార్చారు. వీధి కుక్కలకు కూడా ప్రేమ, సంరక్షణ, భద్రత అవసరమని ఆయన బలంగా నమ్మేవారు. అందుకే ఆయన ఎల్లప్పుడూ వాటి సంక్షేమం కోసం పనిచేశారు. టాటా గ్రూప్ సామాజిక కార్యక్రమాలలో కూడా కుక్కల కోసం ప్రత్యేక స్థానం ఉంది. రతన్ టాటా తరచుగా సోషల్ మీడియాలో వీధి కుక్కలను దత్తత తీసుకోవాలని విజ్ఞప్తి చేసేవారు. గాయపడిన జంతువులకు తక్షణ వైద్య సదుపాయాలు అందించడానికి సహాయం చేసేవారు.