భారతదేశంలో టిక్టాక్ తిరిగి వస్తుందనే వార్తలపై కేంద్ర ప్రభుత్వం స్పష్టత ఇచ్చింది. కేంద్ర ఎలక్ట్రానిక్స్ మరియు ఇన్ఫర్మేషన్ టెక్నాలజీ మంత్రిత్వ శాఖ (MeitY) ప్రకారం, భారతదేశంలో టిక్‌టాక్‌పై ఉన్న నిషేధం కొనసాగుతుంది. దేశ భద్రత, సార్వభౌమాధికారం, ప్రజల వ్యక్తిగత సమాచార గోప్యతకు భంగం కలిగించే ఆందోళనల నేపథ్యంలో టిక్‌టాక్‌ను నిషేధించడం జరిగింది. ఈ అంశాలపై చట్టపరమైన మరియు భద్రతాపరమైన సమీక్షలు ఇంకా కొనసాగుతున్నందున, ప్రస్తుతం ఈ నిషేధాన్ని ఎత్తివేసే ఆలోచన ప్రభుత్వానికి లేదు. చైనీస్ యాప్‌లు వినియోగదారుల వ్యక్తిగత డేటాను సేకరించి, ఆ డేటాను చైనా ప్రభుత్వానికి అందిస్తున్నాయనే ఆరోపణలు ఉన్నాయి. ఇది దేశ భద్రతకు ముప్పు కలిగించే అంశం. భారత పౌరుల వ్యక్తిగత డేటా భద్రతకు సంబంధించి తగిన చర్యలు తీసుకోవడంలో టిక్టాక్ విఫలమైందని ప్రభుత్వం ఆరోపించింది. దేశ సార్వభౌమాధికారానికి మరియు సమగ్రతకు భంగం కలిగించే కార్యకలాపాలకు ఈ యాప్‌లు ఉపయోగపడుతున్నాయని ప్రభుత్వం పేర్కొంది. ఈ కారణాల వల్ల, టిక్‌టాక్‌పై నిషేధం కొనసాగుతుందని, ప్రస్తుతానికి దానిని పునరుద్ధరించే ఆలోచన లేదని భారత ప్రభుత్వం స్పష్టం చేసింది.